Hamas has confirmed the martyrdom of several of its top commanders in the Israeli attack in Gaza

فلسطینی مزاحمتی تنظیم حماس نے غزہ پر اسرائیلی فوج کے فضائی حملوں میں اپنے متعدد اعلیٰ کمانڈروں کی شہادت کی تصدیق کی ہے۔ان میں غزہ شہر میں حماس کا عسکری کمانڈر بھی شامل ہے۔

اسرائیل کی شین بیت سکیورٹی ایجنسی نے دعویٰ کیا ہے کہ فضائی حملوں میں حماس کی 16 شخصیات ماری گئی ہیں۔ان میں حماس کا ایک سینیر کمانڈر اور ہتھیار بنانے کے ماہرین بھی شامل ہیں۔اسرائیلی طیاروں نے ان کی کمانڈ پوسٹ کو نشانہ بنایا تھا۔

شین بیت کے مطابق اس فضائی حملے میں حماس کے غزہ شہر میں بریگیڈ کمانڈرباسم عیسیٰ ،حماس کے سائبر اور میزائل ٹیکنالوجی کے سربراہ جمعہ طلحہ اور اسلحہ سازی یونٹ کے 13 ارکان مارے گئے ہیں۔

باسم عیسیٰ اسرائیل کی 2014ء میں غزہ پر مسلط کردہ جنگ کے بعد حماس کے شہید ہونے والے سب سے اعلیٰ کمانڈر ہیں۔حماس نے ایک بیان میں ان تمام شہادتوں کی تصدیق کی ہے۔

اسرائیلی فوج نے گذشتہ تین روز میں غزہ پرسیکڑوں فضائی حملوں کیے ہیں۔ان میں فلسطینیوں کی شہادتوں کی تعداد48 ہوگئی ہے جبکہ حماس اور دوسری فلسطینی تنظیموں کے راکٹ حملوں میں اسرائیل میں پانچ افراد ہلاک اور متعدد زخمی ہوگئے ہیں۔

اسرائیلی فوج نے بدھ کو بھی غزہ شہر پرمتعدد فضائی حملے کیے ہیں اوران میں کثیرمنزلہ اپارٹمنٹ عمارتوں کو نشانہ بنایا ہے۔اسرائیلی فوج نے یہ دعویٰ کیا ہے کہ ان عمارتوں میں فلسطینی مزاحمت کار روپوش تھے۔ایک اور فلسطینی مزاحمتی تنظیم اسلامی جہاد نے اسرائیلی فوج کے فضائی حملے میں اپنے تین کمانڈروں کی شہادت کی تصدیق کی ہے۔

Leave A Reply

Your email address will not be published.