پاکستان زبردست قیادت کے باعث روشن مستقبل رکھتا ہے: سعودی ولی عہد

اسلام آباد( مانیٹرنگ ڈیسک) سعودی ولی عہد شہزادہ محمد بن سلمان کا کہنا ہے کہ سعودی عرب پاکستان میں مزید سرمایہ کاری کرے گا، اگلے20 سال میں پاکستان میں سیاحت کا شعبہ فروغ پائےگا، آنیوالے وقت میں دونوں ممالک کے تعلقات مزید پروان چڑھیں گے، پاکستان آکر بہت خوشی ہوئی ،ہمارے لیے پاکستان

بہت زیادہ اہم ملک ہے، پاکستان آکر بہت خوشی ہوئی ۔ تفصیلات کے مطابق سعودی ولی عہد محمد بن سلمان کے اعزاز میں وزیر اعظم ہاؤس میں عشائیہ دیا گیا، عشائیے سے وزیر اعظم عمران خان نے بھی خطاب کیا مگر سعودی ولی عہد کے خطاب نے پوری قوم کے دل جیت لیے ۔ سعودی ولی عہد کا کہنا تھا کہ سعودی عرب پاکستان میں مزید سرمایہ کاری کرے گا، اگلے20 سال میں پاکستان میں سیاحت کا شعبہ فروغ پائےگا، آنیوالے وقت میں دونوں ممالک کے تعلقات مزید پروان چڑھیں گے، پاکستان آکر بہت خوشی ہوئی ،ہمارے لیے پاکستان بہت زیادہ اہم ملک ہے، پاکستان آکر بہت خوشی ہوئی، یقین ہےوزیراعظم عمران خان کی قیادت میں پاکستان بہت آگےبڑھےگا، پاکستان ہمارا دوست اور بھائی ہے۔20 ارب ڈالر کی سرمایہ کاری کے معاہدوں کا پہلا مرحلہ مکمل کیا ہے۔

تقریب سے وزیر اعظم عمران خان کا خطاب

تقریب سے وزیر اعظم عمران خان نے خطاب کرتے ہوئے کہا کہ پاکستانیوں کے لیے آج ایک عظیم دن ہے ، سعودی ولی عہد اور ان کے وفد کا پاکستان میں خیر مقدم کرتے ہیں، سعودی عرب ہمیشہ سے پاکستان کا دوست اور بھائی رہا ہے ، سعودی قیادت اور عوام ہمارے دلوں میں رہتے ہیں۔

معاہدوں اور ایم او یوز پر دستخط

بعد ازاں پاکستان اور سعودی عرب کے درمیان معاہدوں اور مفاہمت کی یادداشتوں (ایم او یوز) پر دستخط کی تقریب بھی منعقد ہوئی جس میں وزیراعظم عمران خان اور سعودی ولی عہد بھی موجود تھے۔

دونوں ممالک کے وفود نے معاہدوں اور ایم او یوز پر دستخط کیے۔

پاکستان اور سعودی عرب کے درمیان اسٹینڈرائزیشن کے شعبے میں تکنیکی تعاون اور نوجوانوں کے امور اور کھیلوں کے شعبے میں تعاون کا معاہدہ کیا گیا۔

دونوں ممالک نے بجلی کی پیداوار کے شعبے اور معدنی وسائل کے شعبے میں ایم او یو پر دستخط کیے جب کہ ریفائنری پیٹروکیمیکل پلانٹ کے قیام اور متبادل توانائی مصنوعات کی ترقی کیلئے مفاہمتی یادداشت پر دستخط کیے گئے۔

وزیراعظم کی جانب سے سعودی ولی عہد کے اعزاز میں عشائیہ

ایم او یوز اور معاہدوں کی تقریب کے بعد وزیراعظم عمران خان نے سعودی ولی عہد شہزادہ محمد بن سلمان کے اعزاز میں عشائیہ دیا جس میں دونوں ملکوں کے وفود نے شرکت کی۔

عشائیے میں آرمی چیف جنرل قمر جاوید باجوہ بھی شریک تھے۔

یاد رہے کہ سعودی ولی عہد محمد بن سلمان 2 روزہ دورے پر پاکستان پہنچے ہیں جہاں وزیراعظم عمران خان، وفاقی کابینہ اور آرمی چیف جنرل قمر جاوید باجوہ نے نورخان ایئربیس پر ان کا پرتپاک استقبال کیا تھا۔

اس وقت سب سے زیادہ پڑھی جانے والی خبریں