وفاقی بجٹ: کھیل کے شعبے میں ترقیاتی اسکیموں کیلئے 33 کروڑ سے زائد رقم مختص

وفاقی حکومت کی جانب سے مالی سال 20-2019 کے لیے پیش کیے گئے بجٹ میں کھیل کے شعبے کے لیے نئی ترقیاتی اسکیموں کے لیے 33 کروڑ 99 لاکھ 58 ہزار روپے مختص کیے گئے ہیں۔
بجٹ دستاویز کے مطابق وزارت بین الصوبائی رابطہ (آئی پی سی) کے لیے 33 کروڑ 99 لاکھ 58 ہزار روپے مختص کیے گئے ہیں، جو کھیلوں سے متعلق جاری 7 ترقیاتی اسکیموں کے لیے ہیں۔خیال رہے کہ پاکستان اسپورٹس بورڈ (پی ایس بی) وزارت بین الصوبائی رابطہ کے ماتحت ہے۔
بجٹ دستاویز کے مطابق 89 لاکھ 16 ہزار روپے پی ایس پی کوچنگ سینٹر کراچی میں زیر تعمیر باکسنگ جمنازیم کے لیے مختص کیے گئے ہیں، اسی طرح ایک کروڑ روپے نیشنل اسپورٹس سٹی نارووال کے لیے رکھے گئے ہیں جبکہ پی ایس پی کوچنگ سینٹر کراچی میں اسٹاف کے رہائشی فلیٹس کی تعمیر کے لیے 2 کروڑ 87 لاکھ 17 ہزار روپے مختص کیے گئے ہیں۔
اسی طرح پی ایس پی اسلام آباد میں بائیومیکینکل لیب کی تعمیر کے لیے 4 کروڑ روپے رکھے گئے ہیں جبکہ 5 کروڑ روپے قومی کھیلوں (بین الصوبائی کھیلوں) کے انعقاد کے لیے مختص کیے گئے ہیں۔
اس کے علاوہ 10 کروڑ 20 لاکھ روپے کی مجموعی رقم کو گلگت میں مصنوعی ہاکی ٹرف کو بچھانے کے لیے مختص کیا گیا ہے جبکہ 7 شہروں اسلام آباد، فیصل آباد، واہ کینٹ، پشاور، کوئٹہ اور ایبٹ آباد میں مصنوعی ہاکی ٹرف کی تبدیلی کے لیے 10 کروڑ روپے رکھے گئے ہیں۔
 

اس وقت سب سے زیادہ پڑھی جانے والی خبریں