بچوں کو جراثیموں سے محفوظ رکھنے کا نقصان، خطرناک بیماری لاحق ہونے کا انکشاف

بعض لوگ اپنے بچوں کو زمین پر کھیلنے سے روکتے ہیں اور انہیں جراثیموں سے حتی الامکان بچا کر رکھتے ہیں۔ اب ایسے والدین کے لیے سائنسدانوں نے سخت وارننگ جاری کر دی ہے۔
تفصیلات کے مطابق نیچر ریویوز کینسر نامی جریدے میں شائع ہونے والی اس تحقیقاتی رپورٹ میں سائنسدانوں نے بتایا ہے کہ جن بچوں کو ماں باپ بچپن میں انتہائی صاف ستھرا اور جراثیموں سے بچا کر رکھتے ہیں، بڑے ہو کر ان کو لیوکیمیا (Leukemia)نامی خون کا کینسر لاحق ہونے کا امکان کئی گنا زیادہ ہوتا ہے۔
سائنسدانوں نے اس کی وجہ بیان کرتے ہوئے کہا ہے کہ بچپن میں جب بچے زمین پر کھیلتے ہیں تو انہیں کئی طرح کے جراثیم لگتے ہیں۔ یہ جراثیم جب ان کے جسم میں داخل ہوتے ہیں تو ان کا مدافعتی نظام ان جراثیموں کے خلاف متحرک ہوجاتا ہے۔ اس طرح ان کی قوت مدافعت میں اضافہ ہوتا ہے اور بڑے ہو کر بھی وہ ان جراثیموں کا شکار نہیں بنتے۔
جو بچے بچپن میں ان جراثیموں سے بچے رہتے ہیں بڑے ہو کر جب انہیں یہ جراثیم لگتے ہیں تو ان کا مدافعتی نظام ان کے خلاف متحرک نہیں ہوتا یا بہت کم ہوتا ہے۔ چنانچہ وہ آسانی کے ساتھ کئی طرح کی انفیکشنز اور دیگر بیماریوں کا شکار ہو جاتے ہیں۔ تحقیقاتی ٹیم کے سربراہ پروفیسر میل گریوز کا کہنا تھا کہ ”اپنی تحقیق کے نتائج کے مدنظر رکھتے ہوئے ہم والدین کو تاکید کریں گے کہ وہ اپنے بچوں کو زمین پر کھیلنے کے لیے بھی مناسب وقت دیں۔ اس سے ان کا مدافعتی نظام مضبوط ہوگا اور وہ آئندہ عمر میں بیماریوں سے محفوظ رہیں گے۔“

اس وقت سب سے زیادہ پڑھی جانے والی خبریں