- Advertisement -

مغوی پاکستانی ڈاکٹر کی بحفاظت رہائی پر نائیجیریا کی حکومت کا شکریہ ادا کرتے ہیں: وزیرخارجہ

- Advertisement -

وزیرخارجہ بلاول بھٹو زرداری نے نائیجیریا میں 3 ماہ قبل اغوا ہونے والے پاکستانی شہری ڈاکٹر ابوذر افضل کی بحفاظت رہائی پر نائیجیرین حکومت سے اظہارِ تشکر کیا ہے۔
بلاول بھٹو نے ٹوئٹر پر جاری بیان میں کہا کہ ’نائیجیریا میں مارچ سے مغوی پاکستانی شہری کی بحفاظت رہائی پر نائیجیریا کی حکومت اور عوام کا شکریہ ادا کرتے ہیں‘۔
انہوں نے کہا کہ ’پاکستان میں بھی ہر اس شخص کا شکریہ ادا کرتا ہوں جنھوں نے ان کی رہائی کے لیے انتھک کوشش کی۔‘

Highly relieved by safe release of ?? national Abuzar M. Afzal, kidnapped in Nigeria since March! We thank leadership, government & people of Nigeria for all their help. I also commend the efforts of everyone in Pakistan who worked tirelessly to ensure this outcome.
— BilawalBhuttoZardari (@BBhuttoZardari) July 10, 2022
قبل ازیں دفتر خارجہ کی جانب سے جاری بیان میں بتایا گیا تھا کہ نائیجیریا میں دہشتگردوں کے ہاتھوں مغوی پاکستانی ڈاکٹر ابوذر محمد افضل کو رہائی مل گئی ہے۔
بیان میں کہا گیا کہ پاکستانی شہری کی بحفاظت رہائی میں مدد کرنے پر حکومت پاکستان اور عوام نائیجیریا کے برادر عوام اور حکومت کو بھرپور انداز میں سراہتی ہے۔
بیان کے مطابق ڈاکٹر ابوذر محمد افضل کو 3 ماہ قبل اغوا کیا گیا تھا، وہ 28 مارچ 2022 کو ابوجا سے کدونا جانے والی ٹرین پر حملے میں یرغمال بنائے گئے درجنوں مسافروں میں شامل تھے۔
دفتر خارجہ سے جاری بیان میں بتایا گیا کہ رہا کیے گئے 7 یرغمالیوں میں ڈاکٹر ابوذر محمد افضل واحد غیر ملکی ہیں جبکہ 13 کو ایک ماہ قبل رہا کیا گیا تھا۔
یہ خبر بھی پڑھیں: نائیجیریا میں اغواکاروں کے ہاتھوں مغوی پاکستانی ڈاکٹر کو رہائی مل گئی
رہائی کے بعد کدونا شہر سے ایک ویڈیو پیغام میں ڈاکٹر ابوذر نے اپنی رہائی کیلئے کوششیں کرنے والے تمام افراد، پاکستان اور نائیجیریا کی حکومت اور مذاکرات کاروں کا شکریہ ادا کیا۔
انہوں نے اپنی بحفاظت رہائی اور دیکھ بھال یقینی بنانے کیلئے مسلسل کوششوں پر وزیراعظم، وزیر خارجہ اور وزیر مملکت برائے خارجہ امور کا بھی شکریہ ادا کیا۔
دفتر خارجہ سے جاری بیان میں کہا گیا کہ ڈاکٹر ابوذر محمد افضل کی رہائی کے سلسلے میں ہم نائیجیریا کی سیاسی و فوجی قیادت اور دونوں ممالک کی وزارت خارجہ اور ہائی کمیشنز کے درمیان رابطے کو بھی سراہتے ہیں۔
بیان میں بتایا گیا کہ ڈاکٹر ابوذر محمد افضل ابوجا پہنچ چکے ہیں، ان کو پاکستان کے سفر کیلئے سہولت کیلئے پاکستانی ہائی کمیشن ہنگامی سفری دستاویزات فراہم کر رہا ہے تاکہ وہ واپس اپنے شہر ملتان پہنچ کر اپنے خاندان اور عزیز و اقارب کے ساتھ عیدالاضحیٰ کی خوشیاں منا سکیں۔